بنت الريف //// محمد ابو العبادى

بنت الريف
.............
عشان ف جمالها شئ تاني
ماهوش موجود ف أي مكان
عشان فيها الجمال ألوان
بلون الخُضره طلّتها
وضحكتها ..
بطعم الفجر لمّا يبان
أشوفها أحس بالتوهان
م انا العاشق جمال عودها
وانا اللي الورد ف خدودها
يخلّيني ف لحظه ضعيف
أنا العاشف لبنت الريف
وانا اللي صعيدي من قِبلي
أصون العهد طول عمري
واحافظ ع الأوصول حتى
 ولو حطّوا ف رقبتي السيف

وبنت الريف ...
بلون الخُضره والميه
تشوفها وقاعده ع الترعه
تقول البنت دي حوريه
وجنّيه
بتسحر أي قلب يفوت
وتخطف م العقول تخاطيف
ماهيش واحده من البندر
ولا أبدا بتلبس شاش
دي تقدر تمشي تتغندر
وما بترضاش
وتلمحها ف عز الصهد
بتوب كاسي لحد الأرض
ماهي فعلا تصون العرض
ومنها العفّه تتعلّم
 معاني كل قلب عفيف

ف صوتها معاني للرقّه
ويمكن سيمفونية بوح
وفيها الروح ..
كما البلسم
كما الترياق
ماهي المفطومه ع الأخلاق
وع التقاليد
ف طلّتها هلال العيد
وخطوتها نسيم الصيف
دي بنت الريف
 ........................................

محمد ابو العبادى