المسحراتي (الحلقة "1") للمبدعة ريم صلاح

المسحراتي (الحلقة "1") للمبدعة ريم صلاح

المسحراتي
.............
الأوّله بسمله
والتانيه صلوات
والتالته بالحمد 
نختمها يا حضرات
هل الهلال بالنور
شهر الصيام والخير
ياللي رزقت الطير
أرزقنا بالخيرات
رمضان يا شهر الكرم
الله كريم ف سماه
واحنا بحول الله
نترجّى م البركات
...................................

الحلقة ( 1 )
..............
مسحراتي وماشي 
ف البلاد مشوار
على دق طبله ونقره 
توصل لسابع جار
إصحى يا نايم وسمّي 
وانوي الصيام لله
واجهز بدعوه ف جرابك 
طلّعها ف الإفطار
الخير ف إيد البشر 
والشر م الأباليس
والذكر يمنع خطر 
وينوّر الفوانيس
شهر الصيام ابتدا
واتسلسلوا الشياطين
بينهم وبنّا بحور
وجبال كتير متاريس
إصحى يا نايم وخدلك
من رزق ربّك زاد
دي الدنيا سكّة سفر
ولكل رحله ميعاد
يا بخت من يبتدي
يعمل حساب أخرته
ويشد من دنيته
قبل الختام حسنات
يانايم اصحى
...............................