يا قصيدة يا بنت ال..../ على جامع
السلام عليكم ورحمة الله تعالى وبركاته
ربنا يهديكى وتتنشرى
النشر لاهوه حرام ولا عيب
اطلعى من عبى وعبى الجيب
ياقصيدة يابنت ال .....
مانتيش قنبلة ولا فتاكة
ولا فيكى رموز ولا فيكى ايحاء
من الفك هابطة لحد الياء
دانا حتى ان قلتك من خيبتك
هااتلخبط حتما فى الإلقاء
والناس تتعاطف مع سنى
والشعر اللى اتملا بالشيب
ربنا يهديكى وتتنشرى
دا أقله عشان تعبى ف صورك
اللى انا مكيجتها للجرانين
وعشان الناقد لعيونك
يكتب فى النقد دا لونه حزين
مع انى لاعارف ليه كاتبك
ولا حتى حروفك عارفه انا مين
كل اللى انا عارفه انك خايفه
من ناس هاتقول بتصيع على مين
واتلسوع وقت ماتتنشرى
واكتب إقرار ماانظمش حروف
وإن حد سألنى أقول دى ظروف
أو ساءت حالتى النفسية
او أقول الشعر ف أيامنا
مابقاش الطشة لملوخية
او أقول العيب ماهواش فيكى
العيب ف دماغ شعرى وفيا
والدنيا ماواقفاش على شعرى
طول ماهو مافيهوش وصف بهية
ياقصيدة بطعم الطعمية
كان نفسى تفوز بالتزكية
اتهدى مانفسيش تتنشرى .
نسخ الرابط | |
نسخ للمواقع |