هتصدقينى يا مصر لما ... للشاعرة : إيزيس محمد غانم ؛

هتصدقينى يا مصر لما ...
أقول بحبك...واكرهك...
هتصدقينى...
لمااغنى تحت شجره
واقعد ف ضلك واسمعك
بتغنى للنيل غنوتك
والميّه بلّه طرحتك
تعرفى ...بحس إيه؟؟
بحس إحساس المسافر
المهاجر منك إليكى..
عين بتضحك لما اشوفك
والتانيه شايله دمعتك..!!
بعشقك يا مصر وانتى عاشقه مين؟؟
عاشقه فاسد..عاشقه ظالم
عاشقه مكر المكارين..!
عاشقه مكارك عشان
عطّر عبايته بمكر دين؟؟
عاشقه مين؟؟
وانا عشقى ليكى من سنين..
بس اللى يفرق بينى بينهم
إنى صادقه وهما دايما كدابين
بعشقك يا مصر وانتى عاشقه مين؟؟
مسيلمة الكداب ف عصرة
كان إمام كدبه المبين..
وانتى كدابك يا بلدى 
صدقوة الطيبين
والمصرى دايما لما يعشق
عشقه طيب...
استغلوا طيبته لما 
فرشوا تحته الأرض دين..!!
واكمنه طيب ..أسحروه السحارين...
رضعوه إسلام مزيف
كتفوة بحبل العقيده
لما مسحوا ف برج عقله
فطرة الله الحميده
إستغلوا فقره...ضعفه..
من زاوية الدين المجيده
لماقالوله انت مسلم
واللى بعدك كافرين..
إمتى إمتى يا مصر يصحوا الطيبين؟؟
يقطعوا رؤس الأفاعى 
والحب يجمعهم ف وحده
ويلملموا النيل بين إيديهم
يسقوا كل العطشانين 
يقسّموا بالملح عيشهم
ويرفضوا سارق معاهم 
ويغنوا للعالم بحاله
إحنا تاج مصر اللى شايله بين جدايل شعرها
مصريه أو مصري بحنين
سماحتنا حب...وحدتنا دين..
إحنا اللى عاش ف قلوبنا مينا 
موحد القطرين..
موحد ال
ق
ط
ر
ي
ن
==========
قصيدة وحدتنا دين
 من ديوان هلع الخوف