وابتدت نار الغرام /// كلمات : مرفت جابر

وابتدت نار الغرام

كلمات مرفت جابر 

.....................

قبل مِنّك ...

كنت باخرج م الهزيمه

لجل أدخل ف الدمار

يعني حفره بعد حفره

يعني نار من بعد نار

كل يوم بيفوت عليّا

كان يزيد الإنهيار

عمري كان بيعيش ف موتُه

روحي كانت ف انكسار

كل شئ كان عنكبوت

ع النهار عامل حصار

قلبي كان محبوس ف غار

كهف ضلمه

بابه كان مسدود بصخره

كل شئ كان عتمه جوّه

كل ضي بيبقى برّه

وامّا جيت يا حبيبي عندي

اتفتح باب الأماني

بين إيديك وصبحت حرّه

قلبي طار وكأنُه مُهره

وانت جوّه عيونه فارس

شاف حقيقه جميله عندك

ف انتهت كل الوساوس

قد إيه الحب أجمل

لو تكون يا حبيبي حارس

حبنا يشبه نوارس

مطلوقين ف الكون براح

جيت ف إيدك نجمه قايده

نورها أجمل م الصباح

جيتلي نسّيتني اللي راح

واتفرد حضنك جناين

فيه ورود على كل لون

حاجه تشبه ألف ليله

فيها ليله ..

صعب تلمحها العيون

ليله كانت بس لينا

فيها أحلا غرام يكون

من جمال الحاله فيها

عقل أشواقنا اللي راسي

إنتشى بطعم الجنون

روحنا كون غير أي كون

إنطفت نار المواجع

وابتدت نار الغرام

قلبي قبل الحب واقع

قلبي ويّا الحب قام

شاف غرامك أحلا جنّه

قلبي عاش فيها بسلام

د الخروج م الشوق حرام

ف ابتديت ابنيلي دار

بالبنفسج

والقرنفل

والريحان

قد إيه حلو الأمان

لما يبقى ف قلب حضنك

قد إيه إحساسي عالي

لمّا باكبر وابقى أمك

قد إيه حلوه الشقاوه

لمّا باصغر وابقى بنتك

بس أجمل من دا كُلُّه

لمّا بارجع للطبيعه

وابقى بين حضنك حبيبتك

كل شئ يا حبيبي منّك

له ف قلبي ألف معنى

واللي أجمل م المعاني

شئ كبير جدا جمعنا

محتاجين لمكان يساعنا

حجمه أكبر م الوجود

حجم يتحمّل غرامنا

اللي أكبر م الحدود

وامّا بحر الشوق يجود

شوف بقى إيه احتياجنا

إيه يا روح الروح يساعنا

الأكيد مش جنّه واحده

لأ دا يمكن ..

ألف جنّه

.........................................