...؟مشاهد من داخل الحظر.... // أشرف الشناوى شاعر عاميه البرامون
السلام عليكم ورحمة الله تعالى وبركاته
...؟مشاهد من داخل الحظر....
مشهد 1
نزل الستار
على اخر مشهد
فى المسرحيه
الجمهور
التعيس
حزين رغم النهايه
السعيده
الممثلين
بيحيو الجمهور
وبدأ العامل
يفتح الانوار
وينزل الستار
لازم تنتهى الادوار
مشهد 2
ضوء النهار
والعرق
غاسل وشوش
الناس
الغلابه المطحونين
م الكرونا
والعجين
والف سؤال
فوق وش مراتى
ياترى
الأيام الجايه
هتعدى
يامعلم
مشهد 3
حظر ليلى
ممنوع الخروج
الخوف بيشلع
فى القلوب
حتى الجدران
بتئن
من دق المسامير
فى جتتها
مع أن دمها نشف
بس تسمع
الصرخه
جواك
المطلوب انك
تبقى زى الحيطه
متقولش اه
وتستحمل
دق المسامير
مشهد 4
الحظ برضه
ليه دور
شكارة البطاطس
ياترى هتكفى
العيال
على كام بيضه
حتى الفراخ
والبط
فوق السطح
قطع البيض
مع أنه مش مفروض
عليه الحظر
الله المستعان
مشهد 5
الخلق
فى الشوارع
تايهين
كائننا يوم القيامه
ضحكه باهته
فى الوشوش
الجوامع
قافله البيبان
ربك غضبان
منعنا حتى
ندخل بيته
قد كدا جوانا
خراب وفضا
بس فيه ناس
طيبين
ممكن ربنا يكرمنا
بسببهم
هما ليه مش عاوزين
يدعوا
ربنا يرفع
البلاء دا عننا
مشهد 6
هوا فيه سؤال
محيرنى
هو ايه اقوى
من التانى
المرض والا الفقر
الجوع كافر
اكيد
المرض ارحم
بكتير
يعنى لو الديب
اكل غنمه
او اتنين
او تلاته
والباقى يعيش
ماشى
هى دى حسبة
الغلبان
لقمة العيش
يا
لقمة العيش
اصله ببساطه
وحسبه سهله خالص
هو
كدا كدا
ميت
مشهد 7
تلت تيام
اللمون بقى زى اللحمه
والبرنجان
والفلفل عدا العشره
جنيه
طب ليه
فى عز الازمه
ناس بتدغدغ
راسك
بالازمه
صدقنى أصل انت
زياده
فى العد
لاهتزود فى البنا
ولا هتنقص
فى الهد
ايه يعنى أما تموت
علشان الشجره
تعيش
لازم تتقلم
افهمها لوحدك
يامعلم
أشرف الشناوى
شاعر عاميه
البرامون
| نسخ الرابط | |
| نسخ للمواقع |
0 التعليقات
