🌾مظلومه ياسنين الوجع🌾 🌹🌾أمل مخيمر 🌾

🌹

🌾مظلومه ياسنين الوجع🌾

🌹

أنا حياتي مشقلبه

هوجه ومش مترتبه

ساكنه ربوع العاشقين

ولا سفوح المصطبه

كارهه حياتي والجموع

كارهه بقناعه.

زاهده السكن.. زاهده الوطن

زاهده تلافيف الزمن

زاهده بفظاعه.

ماسكه عناقيد النجوم

حاضنه بساتين القمر

حاضنه الهوى

حاضنه الشجر

حاضنه دموع الطيبين

والضحكه في عيون البشر

ولما فوقت حبتين

وعرقي منطور ع.الجبين

لقتني ماسكه بالإيدين

كبشه خيوط العنكبوت

ساكنه سراديب السكوت

دمعة سنين متحجره

جوه العينين متسمره

ناكر ناكر فوق الكتاف متحيره

مظلومه في زمن الوجع

مخدوعه ف. وشوش الوفا

مصدومه ف. قلوب الصفا

ضاع الوفا.. ضاع الأمان

ضاعت ملامح الحنان

صرخ الجنين جوه العقول

عيشه قرف

عيشه زهق

عيشه هباب

والشعر شاب

والرجل وحلت بالتراب

مسكينه ياسنين الوجع

ساكن ملامحك العطب

ساكنك تجاعيد الصخب

وإن جيت أصالحك حبتين

يجي الأنين

ملفوف لي في لفة هدايا

جايبلي في إيديه زهرتين

بشوف ملامحه ف. المرايا

يضحكلي ضحكه معلقمه

ويقولي زوري المفرمه

تحت تروس الشقيانين...إتمددي

جوه كشوف المجروحين...إتقيدي

شايفه الزهور ماليه بساتين الوجع

خف المطر

جف الورق

مظلومه ياسنيين الوجع

زارك خريف الموجوعين

صارت حياتي مكركبه

فيها وشوش متركبه

حتى ملامح الزيف متزوقه

ضحك الأنين وقالي بتريقه

رحل ربيع العابرين

دبلت زهور الزايرين

وإيه تعمل الأزهار

ف. قلوب الميتين

ومظلومه ياسنين الوجع

🌹🌾أمل مخيمر 🌾