رحايا :: (بقلم) ريم صلاح

رحايا
......
تعدّي الذكرى والتانيه
على قلبي تروس دايره
مافيش حاجه توقّفهم
ولا تحوشهم
ودايما يطحنوا فيّا
كأني القمح ف رحايا
مانيش لقياني وسط الناس
وتايهه برغم ويّايا
لا قادره ع الهروب منّي
ولا قادره على بدايه
ولو ح ابدأ باكون عاجزه
أشوف لبدايتي دي نهايه
يادنيا الحزن بكفايه
ما عودتش قادره أتحمل
دموعي بتحجب الرؤيه
وعاجزه الخطوّه وب اكمّل
محال اوصل لأخر شوط
وانا المدبوحه م الأوّل
يا نهر الحزن م تحوّل
طريقك عنّي واتّاخر
ما تحلفشي على عمري
يكون حزنه مالوش أخر
يا ضحكه من وجع ساخر
أنينِك زاد ف شرياني
م انا الدايره اللي ف الدايره
وميت دايره محاوطاني
وانا النُص اللي بيدوّر
ف كهف الموت على التاني
وإيه تاني ..
يا ذكرى ح تعمليه ف الروح ؟
ما فيش طيران لطير واقع
على أرض الوجع مجروح
ما فيش تغريد لطير مدبوح
مافيش غير رقصة الأموات
ودم يسيل
وعفره من تراب الأرض
وحضن الليل
ما فيش إلا نواح وعويل
وانا العايشه ما عندي بديل
سوا إني أكون واقعه
ف قلب تروس من الذكرى
واسيبهم يطحنوا فيّا
كأني ..
قمح ف رحايا
..................................