(نهرى نهرك) الشاعر وحيد راغب

(نهرى نهرك)
سيب شقاوتك خلف منك
وابتدى اللحن الجديد
ابن بنتى ف بَحِرى ساكن
وابن ابنى ف الصعيد
مهما بتشخبط ف لوحتى
باقى فيها السحر طالل
والمحبة بلون سمانا
والمُجَسَّم والعتيد
نهرى نهرك يا ابن عيسى
نهرى نهرك يا ابن طه
مجرى واحد
القلوب بتفيض جمالها
جار بجار
والبسمة ناهد
صدرى ليك وقت المواجع
روحى فيك
تشهد عيونى والمسامع
أى زحف لفصل روحنا
أفعى سامة
أو بِرك بنقيق ضفادع
سرِّى عندك
زى عندى
كلنا كف بأشاجع
جدِّفوا هانظل حكمة
شمسها ف خد التاريخ
النخيل ما يهزُّه أبدا
ريح بتعوى
أو صريخ
والنجوم ما يخبى نورها
غيمة شاردة
.. ليل عتمته كالمسيخ
والزهور ما يصد منها
ضُوع شذاها
جدار وقاطف
الملِيح انسان بنهجه
زرعُه حِس
ملان عواطف
اختفى يا مِلح عنا
اللى بينا أرض خصبة
والمايسترو
حرَّكِ الالحان اشارتُه
الكامنجة وعود وناى
والعوازف من امارتُه
كل منا هزِّ شوقُه
واحتضن بالروح منارته
الشاعر وحيد راغب